Nuacht

Mar chuid den chomóradh Colmcille 1500, agus mar a fógraíodh ar na meáin shóisialta, tá sé i gceist againn roinnt coimisiún a bhronnadh ar ealaíontóirí in Éirinn agus in Albain. Saothair a dhíreoidh ar ghné éigin d’oidhreacht Cholmcille agus ar an chaidreamh idir pobail Ghaeilge na hÉireann agus na hAlban i réimse uile na n-ealaíon atá uainn. Samhlaítear go mbeidh coimisiúin idir €2,500 agus €15,000 i gceist ag brath ar an gcoincheap, an ceangal le Colmcille agus an nasc idir Gaeilge na hÉireann agus Gàidhlig na hAlbain. Má tá tionscadal ar intinn agat déan teagmháil linn le do thoil ag colmcille@forasnagaeilge.ie. Is é an spriocdháta d’iarratais as Éirinn (thuaidh nó theas) an 10 Meán Fómhair, agus d’iarratais as Albain an 15 Meán Fómhair. Tá foirm iarratais ar fáil anseo.

Sraith de naoi gcinn de léachtaí ar líne de chuid ‘Colmcille 1500’, á reáchtáil ag Seirbhís Leabharlainne Dhún na nGall, leis na haoichainteoirí an Dr. Brian Lacey, Christy Gillespie, Donal Mac Polin, Tim Stampton, Paula de Fougerolles agus Joe Brennan. Tá na léachtaí seo ar fáil saor in aisce, ar líne, ar chainéal Youtube Comhairle Contae Dhún na nGall: https://www.youtube.com/user/wwwdonegalcocoie/videos Tuileadh eolais: www.donegallibrary.ie

Tuilleadh eolais ag: www.donegallibrary.ie

MEITHEAL CHOLMCILLE – 8 LÚNASA 2021

Beidh an t-ealaíontóir Cathal Mac Fhionnghaile as Inis Bó Finne, ag stiúradh meitheal ealaíne istigh ar Oileán Dúiche mar chuid de bhliain chomórtha Cholmcille, ‘Colmcille 1500’. Beidh béim ar an cheangal a bhí idir Naomh Colmcille & Naomh Dubhthach agus an béaloideas atá bainteach leo. Beidh Cathal ag campáil ar feadh seachtaine ar an oileán agus ag péinteáil le linn an ama sin. Ar an 30 Iúil rachaidh páistí ó chlub óige Mhachaire Rabhartaigh chun an oileáin, chun tabhairt faoin tionscadal ealaíne chomh maith i gcomhar le Cathal.

Ar an 8 Lúnasa beidh taispeántas ealaíne de chuid na bpáistí agus de chuid Chathail. Beidh siúlóíd threoraithe agus turas bád thart ar Inis Bó Finne chomh maith le ceol, scéalta agus sólaistí.

Tá feachtas buan ar bun le Slí Cholmcille a fhás mar chianturas siúlóide ar nós an Camino de Santiago de Compostella idir an Fhrainc agus an Spáinn.

Tá cuid mhór le tairiscint ag an tSlí. Tá mórán áiteanna i dTír Chonaill as Gleann go Toraigh agus Gartán a bhfuil ceangal láidir acu le Colmcille nó Columba, naomh mór na hÉireann na hAlban agus Thuaisceart Shasana. Tá éileamh mór ar chianturais siúlóide mar thuras spioradálta agus mar bhealach ar eolas a chur ar an tír agus an dúlra.

I mbliana, mar a tharla anuraidh, cuirfidh COVID teorainn ar an líon daoine a bheas páirteach ach cuirfidh daoine chun bealaigh ar an 4 Iúil le siúl 270 ó Ghleann Cholmcille go Doire thar 12 lá ag cur crích ar an turas ag Srúibh in Inis Eoghain. Ar a mbealach, tabharfaidh siad cuairt ar sheanmhainistir Thoraí, áit breithe an naoimh i nGartán, suíomh mhainistir Ráth Both agus ardchros Ráithe, an chros fháinneach airde agus is sine in Éirinn.

Tharla siúlóid i dtús Mhí Mheithimh idir baile Dhún na nGall agus Gleann Cholm Cille, ag nascadh oidhreacht Cholmcille in áiteanna mar Dhroim Thuama agus Díseart leis an chuid eile den tSlí. Beidh siúlóid arís idir baile Dhún na nGall agus Díseart Cholmcille ar an 3 Iúil.

Tá Colmcille 1500 ina chomóradh ar 1500 bliain ó rugadh Colmcille, agus táthar ag súil go mbeidh an cianturas camino mar oidhreacht fhadtéarmach air.

I mbliana tá teorainn de 30 le líon an lucht siúil. Le tuilleadh sonraí agus plean turais a fháil nó le clárú don thuras, déan teagmháil le maureencurran@yahoo.ie