Is comhpháirtíocht é Colmcille idir Foras na Gaeilge agus Bòrd na Gàidhlig, a chuireann chun cinn úsáid Ghaeilge na hÉireann agus Ghaeilge na hAlban in Éirinn agus in Albain agus idir an dá thír. Is é is aidhm do Cholmcille, trína chuid oibre, tuigbheáil a chothú ar eispéireas agus cultúr ilghnéitheach phobail Ghaeilge na nÉireann agus na hAlban, agus díospóireacht a spreagadh ar ábhair is cás don dá phobal araon maidir le ceisteanna sóisialta, cultúrtha agus eacnamaíocha, d’fhonn féinmhuinín a thógáil sna pobail teanga Ghaelacha.
Is é aidhm Cholmille cainteoirí Gàidhlig na hAlban agus Gaeilge na hÉireann a thabhairt le chéile:
a) le heolas agus le haithne a chur ar a chéile, a dteangacha, cultúr agus oidhreacht
b) le cluas ghéar a thabhairt dá chéile agus a dtraidisiúin chultúrtha a chomhroinnt
c) le heolas a chomhroinnt agus le comhoibriú le freastal ar riachtanais a chéile
d) le feasacht a ardú ar an timpeallacht nádúrtha, fhisiceach agus chultúrtha ina maireann siad, agus sláinte agus folláine na dteangacha Gaelacha a bhuanú mar chuid den timpeallacht sin
e) le comhoibriú le cainteoirí Ghaeilge na hAlban i gCeanada, agus le cainteoirí Ghaeilge Mhanann
Is í an obair i gcomhpháirt dúshraith ár gcuid oibre trí Cholmcille; cothaíonn sí cairdeas agus caidreamh agus tógann sí struchtúir inar féidir le daoine comhoibriú. Feidhmíonn Colmcille trí scéimeanna deontais agus trí thionscadail a éascú agus a thionscnamh.
As an teagmháil idir cainteoirí an dá theanga is féidir tógáil ar na comhchosúlachtaí. Is féidir rudaí atá ar aithne a fheiceáil ar bhealach nua, éagsúil gan a bheith coimhthíoch ná bagrach. Thig linn teacht ar spás úr do Ghaeilge na hAlban agus na hÉireann, neart san éagsúlacht.
Is féidir straitéis Cholmcille do 2019 – 2021 a íoslódáil anseo.
Is féidir léarscáil Cholmcille (2011) a íoslódáil anseo.
Is féidir Lógó Cholmcille 1500 a íoslódáil anseo
