Bidh Colmcille ag obair tro sgeamaichean tabhartais agus tro bhith a’ comasachadh agus a’ tòiseachadh phròiseactan. Bidh am maoineachadh a’ cur taic ris na cuspairean a leanas: na h-ealain, daoine òga, dualchas, ionnsachadh Gàidhlig na h-Alba agus Gàidhlig na h-Èireann, leasachadh com-pàirteachais is coimhearsnachd, agus rannsachadh.
Ann an Alba, bidh Bòrd na Gàidhlig a’ toirt taic do sgeama tabhartais bliadhnail Cholmcille a bhios, gu sònraichte, a toirt taic do phròiseactan a tha a’ coileanadh na leanas:
- A’ brosnachadh cleachdadh na Gàidhlig agus na Gaeilge tro na h-ealain
- A’ brosnachadh dualchas gus coimhearsnachdan Gàidhlig a thoirt còmhla agus inbhe nan cànain Gàidhealach àrdachadh
- A’ toirt luchd-labhairt òga Gàidhlig na h-Alba agus Gàidhlig na h-Èireann còmhla tro thachartasan no pròiseactan sgoile
- A’ brosnachadh conaltradh, a’ co-roinn eòlasan agus cleachdaidhean matha eadar luchd-labhairt Gàidhlig na h-Alba agus Gàidhlig na h-Èireann
- A’ toirt taic do dh’ionnsachadh Gàidhlig na h-Èireann am measg luchd-labhairt Gàidhlig na h-Alba
Gheibhear foirm tagraidh agus stiùireadh mu sgeama Cholmcille an seo.
Ann an Èirinn tha Colmcille air a ruith le Foras na Gaeilge air stèidh thar-chrìochan agus tha trì sgeamaichean tabhartais ann: • Sgeama Tabhartais Cholmcille, airson pròiseactan, aig a bheil dà chuairt maoineachaidh gach bliadhna • Sgeama tabhartais bheag Cholmcille airson a bhith a’ togail chom-pàirteachasan agus phròiseactan, a tha fosgailte gu leantainneach • Sgeama bursaraidh Cholmcille airson luchd-labhairt na Gaeilge a bhios ag ionnsachadh Gàidhlig na h-Alba
Gheibhear foirmean-iarrtais agus stiùireadh Foras na Gaeilge an seo.
